2018年1月16日 星期二

2017年花花遊世界:首次歐遊~意大利自由行 Part 3: 比薩, 五漁村, 盧卡




快捷地 將威尼斯比賽的相片上載到 Facebook, 開開心心成隊人吃完聚餐,
隊友們就四散繼續各自既遊樂團


雖然住左咁多日威尼斯係有點兒悶, 但一朝早離開Apartment 時都帶著依依不捨的心情離開.....因為間屋其實真係好靚好好住......而最後一晚的聚餐, 事隔多月仍感溫馨


大概十點鐘CheckOut, 記得當初plan 行程時以為 o係威尼斯既日子, 九成都係比賽唔會有時間觀光, 所以開初係理想化地十點check out,  然後將行李寄存係火車站, 然後再周圍行下, 仲特登買左 15:00pm 既火車飛......最後行程當然不似預期, 一來短短五小時其實話多唔多, 由Apartment 行去火車站寄存已經要一定的時間, 再坐埋Waterbus遊覽,  其實時間唔係咁夠用, 而大景點我地第一日都已經行過, 加上有隊友反映其實一去到人多既地方 好似火車站咁, 已經要十分注意自己身邊d陌生人, 例如d 賣花黨、拖o急黨.....其實咁多前提既情況下, 我地最後決定 慢慢拎住自己既行李 由 Apartment 行去火車站附近搵間餐廳坐到夠鐘就算.....Hea時間對我絕對唔係一個問題...haa


威尼斯既路絕大部份都唔係平路又多橋, 所以咁樣拎行李去火車站係有點笨實, 去到火車站附近其實餐廳唔算多, 我地搵左間係正火車站對面既餐廳坐下食下野, 價錢算中規中距, 某程度上我地只係第三餐o係威尼斯既餐廳開餐 (其他都係自己煮), 都係o個句, 係意大利絕不可以用香港人咁急促既節奏去用餐....你越急.....侍應會越唔理你.....反而你由得佢地做完佢地要做既order, 佢地會好有條理亦會有心機d 去serve 你........不過呢d 都唔係今part既重點, 重點始終係topic 既 比薩, 五漁村, 盧卡。 


我地會由 威尼斯坐火車到佛羅倫斯,
然後第二日 由佛羅倫斯坐火車到比薩, 五漁村
五漁村留一晚 再去 盧卡 再返佛羅倫斯....
而呢一篇就會主要介紹 比薩, 五漁村, 盧卡 呢三個地方


呢兩日既火車飛都係早一日或者即日現場買, 
有關班次時間同行程費可以係返 >> 官網 << Search 


本身行程其實係先去盧卡, 回程再去比薩的,
但其實上下兩路都分別不大, 而本身意大利既天氣預報都有九成準, 
可以預測到幾點有幾多成機會落乜野程度既雨, 
咁我地當日出發時見到盧卡 落雨機會大過比薩, 
所以當日臨時轉行程, 去左比薩, 回程先再去盧卡

我地參考左D Blog 決定左個路線咁行, 由佛羅倫斯坐火車到呢個站Pisa Central 起行, 
係Pisa S.Rossore 坐火車去五漁村必經之站  La Spezia




到達Pisa雖然冇落雨, 但天色就陰陰暗暗的......
原來早一兩日意大利呢一區落超大雨, 應該意大利政府疏於處理呢個水患問題, 火車站有一邊係水浸之餘, 沿路入去 Pisa 中心 既鋪頭都掃緊鋪頭入面d 積水出黎.....究竟之前係水浸到乜野程度

Pisa 比我想像中細, 景點不算特別多, 我地只係沿路直行, 冇特別於橫街窄行中穿插, 而最著名既景點比薩斜塔都比我想像中細同.....遜色 ..XDD....好似去左世界之窗咁  
隔離奇蹟廣場可觀性仲高過個塔, 而遊客們係不同位置做不同動作去借位影相都好搞笑.....但始於我地去到係陰天, 所以影出黎既相都唔係太過吸睛...... 走馬看花用左大概兩小時行完, 就趕火車出發去五漁村


五漁村簡單d 講就係沿岸由五條漁村組成既一個大景點.....詳細既背景資料大家可以自己再search下其他blog, 因為要搵相關資料實在太易, 我地著重返遊覽左d 乜野 ..XDD,
好多人事前會諗究竟花一日定兩日去玩五漁村, 如果夏天撞o岩天氣好, 一定要玩兩日先夠玩, 因為唔同村既海灘都有唔同玩法:滑浪、長長的海灘、日光浴、崖邊游水,如果想就咁花一日玩晒五條村會急趕d, 大家plan 行程時想有鬆動時間, 可以好似我地咁, book 一日 五漁村既酒店, 分開兩日玩....




點我到 五漁村官網 
官網會有五漁村簡介, 包括村同村之間既棧道有冇開, 因為有時因天氣或者維修會封閉, 我地去o個時就咁岩封左冇得行, 另外可以參考下 day pass (13 Euro) 同one-way ticket(4 Euro) 既價錢, 時間班次(呢個好重要) 再plan行程




因為聽人講由下至上咁數, 第一, 二條村係較為靚, 所以我地揀左住Riomaggiore (第一條村) 住一晚, 落火車望到個海係靚既.......向山上行, 我地book 左間差不多最高既一間屋, 可能係我地其他屋Book得太靚...所以覺得五漁村呢間有點兒中規中矩。一個拎Google Map(準d) , 一個拎Apple Map, 左搵右搵,  行左半個鐘到終於搵到, 好彩我地個個體能都唔算差...XDD, 到步都已經差不多四五點, 不過意大利日落時間較晏, 所以我地放底行裝換返對拖鞋就再出發.......


我地遊玩的路線圖....雖然係可以玩坐船行海路, 但當然我地全部都係坐火車, day 1 用 1day pass, day 2 買sinlge ticket



第一站直上最高, 其實out of 左 五漁村既一條村落, 有香港長洲之稱(我地話) 既Levanto, 沿路一直行, 真係一直行, 帶點肚餓咁一直行, 行大慨三四個字就會去到海邊, 相信係呢到既景點, 天陰陰涼涼的.....但都有唔少人係到滑浪......留左陣影下相打下咭就走了


搭回頭車一個站, 黎到Monterosso (第五條村), 呢條村出名亦係一個有長長海岸線既灘....之前有諗過天氣好, 時間夠的話, 會o係呢到浸下水.....但眼見個雨雲咁兇恨地黎緊, 團友們係都要掂下水.......連個巨人像都冇睇就急急腳走了, 好彩岩岩走到車站等車時 係最大雨.......



時間始於有限, 我地捨棄左Corniglia (第三條村), 因為普遍都話呢條村較少野睇, 所以就去埋 Vernazza(第四條村)就完左今日行程....仍然下著密密的雨...著名的崖邊餐廳因天雨關係冇開.....如果好天, 呢到一定好靚......諗住返轉頭求其搵間野食, 但較大o個兩間都要等位, 好彩行落海邊時我見到橫街有間餐廳, 於是去碰碰運氣.......



餐廳名可以係google map 到搵到 - Trattoria Da Piva, 除左落雨, 我地d 運未用晒架!! 遲d 入黎都無位, 都係因為天雨關係, 室外冇開, 室內計埋我地得四枱, 食到尾對面兩枱唔識既外國人都一齊飲酒傾計, 好似河國榮既老闆又拎枝結他出黎自彈自唱, 氣氛不錯的說, 而野食都唔錯, 只係我地太慣有熱既飯麵落肚, 所以顯得佢個海鮮湯特別好食, 食完見有時間飲完酒大家又飲多杯咖啡就回程了...食左咁多都係 200Euro 埋單, 唔算貴......


返到酒店又飲左幾杯之後, 訓醒好天氣 😍😍😍, 有個藍天爭好遠好遠Lor !!!!沿路都不停影相不停影相, 咁玩都玩左有個幾鐘....

Riomaggiore 最下面個海港係必到, 好天氣下, 有人都會係個堤內游水, 
如果我地夏天到有足夠時間一定都會落海玩.....

本身諗住就係由Riomaggiore 行棧道去Manarola, 但真係咁好彩封左冇開, 唯有坐一個站火車上去Manarola行下......




到左Manarola, 根本係赤柱大街 😂😂, 大街D 鋪頭冇乜點睇過, 我地直落海邊睇景打咭, 係靚既, 長長的海崖邊, 回望返係崖邊七彩既小屋, 加埋個藍天, 堅靚.. Manarola 都有一個唔知算唔算得上海港仔既位, 好多人係都日光浴又落海玩,

我地走既時候仲有幾個外國人落完海走黎一齊影相, 呢D 咪旅行Lor XDD.......
時間差唔多就出發去 Lucca 盧卡城了







中間有段小插曲, 就係我地o係五漁村  La Spezia 去 Lucca, 係要經過 Viareggio呢個站轉火車
但因為係五漁村既火車有delay, 令到我地去到Viareggio既時候送車尾, 咁點算呀? 旅行真係要發生呢d小插曲先叫做旅行!? 幸好問過車站既職員, 雖然火車飛上面有mark住時間, 但就算我地咁樣miss 左班車都一樣可以坐同一個方向既火車而唔駛再買飛。咁唯有出車站睇下有乜行或者有乜食可以坐下, 揀左陣都係揀左係正火車站對面既快餐店坐底食下野, d野食 一d 都唔貴, 雖然係好似sub-way咁似快餐店, 但係店員都勁nice lor.....唔記得左係唔係拎錢定乜野, 俾佢地fake 左, 最後仲要送左枝大水俾我地飲.....雖然唔係d 乜野, 但呢段小插曲諗返起其實都幾得意












Viareggio 呢個小鎮都係一個類似Levanto既小鎮, 長長既直路就係海邊



最後終於下晝五點幾到達我地既目的地Lucca-盧卡城, 係一個四面都有圍牆圍住既城鎮, 有d人會係到住一晚, 圍住既城牆可以俾人長跑同踩單車, 唔難見到有遊客咁做........事前並沒有做太多相關既research, 因為主要景點係google map 都有show 出來: 盧卡主教座堂, 聖彌額爾教堂,圓形競技場廣場, 主要都係呢三個地方。

長長既城牆上兩旁都會排得好整齊既樹木, 而Lucca 城既四邊都會有城門, 城門上面都有不同既特色
其中一個城門中既塑像, 有點兒似墜天使的感覺

                                       作為咖啡精的我們, 當然又搵左間cafe 入去歇一歇腳......


最後我地終於到達圓形競技場廣場, 圍繞住呢個廣場大部份都係餐廳, 而外圍就全部係大大少少既店舖, 冇威尼斯商店街咁俗氣, 有較多既皮具店鋪, 有個展覽館不同時期都有不同既展覽, 我地o個時就係一個刑具展覽, 不過要入場費, 我地既團友又興趣不大, 所以冇入去行........

當然我地既晚餐都係返Lucca 呢個圓型廣場隨機揀左間食, 但呢間確實係mama地, 點解放呢條燒雞, 因為呢隻燒雞陣燶味仲好似聞到咁....XDD不過餐廳名已經唔記得左, 下次會提自己呢d 細節都會記底埋...haa
呢幾日既行程睇既教堂都係日頭睇, 原來夜晚睇, 會多左份神秘的莊嚴, 而我地比薩, 五漁村, 盧卡兩日一夜既行程亦都完結, 黎緊會用足一日既時間去走遍大部份佛羅倫斯......在那很多的地方都教人眼前一亮.....
後記: 原來係外國人既世界, 只要自己見唔到外面既時候, 外面既世界都一樣唔會見到佢地架XDD,
莫非佢地o個件係失效既哈利波特隱形袍? 


Click Here To My Facebook Page

沒有留言:

張貼留言